Geopolitisk stríð hevur elvt til stór sveiggi í orkuprísum og harafturat hevur búskapargongdin verið betri enn væntað. Tað ger, at miðbankarnar hava hækkað renturnar, og at útlit eru til, at renturnar fara at hækka enn meira.
Altjóða fíggjarmarknaðirnir hava í ár verið merktir av geopolitiskum stríði og sveiggjum í orkuprísum, sum hava givið óvissu um inflatións- og rentuútlitini. Avmarkaður skipaflutningur gjøgnum Hormuzsundið hevur tarnað millum annað flutningi av olju og elvt til stóru sveiggini í orkuprísum. Hægri orkuprísir økja inflatiónstrýstið og harvið eisini sannlíkindini fyri, at miðbankar hækka renturnar.
Bæði evropeiski miðbankin, ECB, og amerikanski miðbankin, Fed, hava hækkað leiðandi renturnar í ár. ECB hevur hækkað renturnar í juni og september við 0,25 prosentstigum, tvs. við 0,50 prosentstigum tilsamans, meðan Fed fyri kortum hækkaði rentuna á fyrsta sinni í ár, somuleiðis við 0,25 prosentstigum.
Fyri báðar miðbankarnar eru í løtuni útlit til, at renturnar kunnu hækka meira komandi mánaðirnar. Hetta kemur serliga av, at inflatiónstrýstið framvegis er lutfalsliga høgt, samstundis sum búskapargongdin hevur verið betri enn væntað. ECB hevur í seinastuni hækkað sínar metingar um búskaparvøkstur og inflatión í evruøkinum komandi ár, meðan nýggj amerikansk lyklatøl og metingar frá Fed somuleiðis benda á framhaldandi búskaparvøkstur í USA. Rentuútlitini kunnu tó broytast skjótt við broytingum í búskaparútlitunum.
Danski tjóðbankin hevur hækkað sínar leiðandi rentur samsvarandi rentuhækkingunum hjá ECB. Av tí sama eru renturnar eisini hækkaðar í føroysku bankunum. Bæði inn- og útlánsrenturnar eru øktar eitt vet í føroysku bankunum í august 2026 orsakað av rentuhækkingini, sum danski tjóðbankin framdi í juni 2026. Seinna rentuhækkingin, sum danski tjóðbankin boðaði frá í september 2026, verður framd í føroysku bankunum síðst í oktobur ella í novembur 2026.
Miðal útlánsrentan hjá føroysku privat- og vinnukundum í føroysku bankunum var 4,39% í august 2026, meðan miðal innlánsrentan var 0,65%, sí mynd 1. Rentumarginalurin er munurin millum innláns- og útlánsrentuna.
Les meira í frágreiðing Landsbankans um fíggjarliga støðufestið fyrra hálvár 2026 her.