Landsbanki Føroya sóknast eftir einum fakliga sterkum búskaparfrøðingi. Tín høvuðsuppgáva verður at vera partur av skrivaratoymi Búskaparráðsins, har uppgávurnar eru at gera konjunkturfrágreiðingar, temafrágreiðingar og at hjálpa limunum við fakligari ráðgeving
Sum skrivari hjá Búskaparráðnum fert tú bæði at arbeiða við búskaparligari ástøði, hagfrøði og skriva greiningar. Greiningarnar hjá skrivaratoyminum eru fakliga grundarlagið hjá Búskaparráðnum, tá ráðið veitir politisku skipanini tilmæli og óhefta ráðgeving. Greiningarnar skulu tí vera væl orðaðar, skjalprógvaðar og grundaðar á búskaparfrøðiliga ástøði.
Vit kunnu bjóða tær eitt starv, har tú verður partur av einum fakligum umhvørvi á høgum støði millum aðrar búskaparfrøðingar, sum hava serkunnleikar á ymsum økjum, sum tú kanst ráðføra teg við dagliga. Tú verður ein týðandi partur av einum arbeiði, sum myndar búskaparliga kjakið í samfelagnum og vónandi eisini búskaparpolitikkin frameftir. Tú fært góðar møguleikar fyri fakligari og persónligari menning.
Av førleikakrøvum skalt tú hava lokið kandidatprógv í búskaparfrøði (cand. polit., cand. Oecon. ella líknandi) Tú skalt vera fakliga forvitin og brenna fyri at gera greiningar av ymsum samfelags-búskaparligum viðurskiftum. Tú skalt hava gott innlit í føroyska búskapin og duga væl at orða teg á skrift og í talu, umframt kunna greiða frá torgreiddum búskaparligum evnum á einum máli, ið er lætt at skilja.
Vit vænta, at tú dugir bæði at samstarva og at arbeiða sjálvstøðugt. Hetta er eitt starv við drúgvum verkætlanum, sum krevur, at tú hugsavnar teg, samstundis sum tú megnar at koma á mál til tíðina.
Lønin verður ásett eftir sáttmála millum Búskapar- og Løgfrøðingafelag Føroya ella viðkomandi yrkisfelag og Fíggjarmálaráðið. Talan er um eitt fulltíðarstarv.
Hevur tú spurningar til starvið, kanst tú seta teg í samband við Maluna Johansen, stjóra í Landsbanka Føroya, á 226225 ella á malan@landsbankin.fo.
Umsóknin skal vera okkum í hendi í seinasta lagi sunnudagin 13. august 2023. Umsókn við lívsrensli, prógvi og øðrum viðkomandi skjølum skulu sendast til malan@landsbankin.fo.
Allar umsóknir verða viðgjørdar í trúnaði.
Landsbanki Føroya er almennur fíggjarstovnur, ið umsitur landsins gjaldføri og fyrisitur landsins lántøku. Landsbanki Føroya er eisini greiningarstovnur, ið virkar fyri fíggjarligum støðufesti í Føroyum. Nevndin hjá Landsbanka Føroya er eisini Búskaparráð Føroya. Búskaparráðið fylgir við búskaparligum viðurskiftum í landinum og kemur við óheftari búskaparligari ráðgeving og frágreiðingum um búskaparligu gongdina. Landsbankin er skrivstova hjá Búskaparráðnum. Sum skrivstova fyri Føroya Váðaráð skal bankin vera við til at hava eftirlit við systemiskum fíggjarváðum. Bankin fyrisitur eisini Arbeiðsmarknaðareftirlønargrunnin. Nýggju fólk starvast í Landsbankanum.